ភ្នំពេញ៖ អគ្គនាយកដ្ឋានពន្ធដារ ប្រមូលចំណូលពន្ធអាករសម្រេចបាន៣ ០៦០,៩៥លានដុល្លារ ស្មើនឹង៨៥,៧០ភាគរយ នៃផែនការប្រចាំឆ្នាំ២០២៣។ នេះបើតាមសេចក្តីប្រកាសព័ត៌មាន ស្តីពីកិច្ចប្រជុំបូកសរុបអនុវត្តបន្តរបស់អគ្គនាយកដ្ឋានពន្ធដារ ដែលធ្វើឡើងក្រោមអធិបតីភាព រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ឧបនាយករដ្ឋមន្ត្រី អូន ព័ន្ធមុនីរ័ត្ន នាថ្ងៃទី៣០ ខែតុលា ឆ្នាំ២០២៣។

ដោយគិតត្រឹម៩ខែឆ្នាំ២០២៣ អគ្គនាយកដ្ឋានពន្ធដារ បានចុះបញ្ជីសហគ្រាសជោគជ័យចំនួន ១០ ១១៦ សហគ្រាស ក្នុងនោះតាមថ្នាល CamDx ចំនួន ៩ ១៨៩ សហគ្រាស។ សម្រាប់រយៈពេល៩ខែ ឆ្នាំ២០២៣ មានសហគ្រាសចំនួន ៣៤៧ បានស្នើសុំនិងទទួលបានអត្ថប្រយោជន៍ ពីការអនុវត្តកិច្ចព្រមព្រៀងស្ដីពីការចៀសវាងការយកពន្ធត្រួតគ្នា។

៩ខែមកនេះ អគ្គនាយកដ្ឋានពន្ធដារ បានផ្តល់សេវាពិគ្រោះយោបល់ជូនអ្នកជាប់ពន្ធនិងសាធារណជនទូទៅសរុបចំនួន ៨៦ ០៣៦ ករណី ក្នុងនោះ តាមរយៈ Call Center 1277 ចំនួន ៥២ ៣១០ ករណី និងបានផ្តល់សេវាគាំទ្រផ្នែកអេឡិចត្រូនិក (e-Tax Service) ជូនអ្នកជាប់ពន្ធបានចំនួន ២៥ ១៧៦ ករណី ក្នុង គោលដៅសម្រួលដល់ការប្រើប្រាស់ប្រព័ន្ធនិងកម្មវិធីរបស់អគ្គនាយកដ្ឋានពន្ធដារ។

រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំគ្រប់លំដាប់ថ្នាក់ និងមន្ត្រីទាំងអស់ ក្នុងការចូលរួមចំណែកបំពេញភារកិច្ចអស់ពីកម្លាំងកាយចិត្ត និងសម្រេចបានលទ្ធផលការងារគ្រប់គ្រងប្រមូលចំណូលពន្ធយ៉ាងល្អប្រសើរសម្រាប់រយៈពេល៩ខែ ឆ្នាំ២០២៣នេះ៕